កម្ពុជាបានរៀបចំពិធីរំលឹកគុណអង្គររយៈពេល១០ថ្ងៃ ចាប់ពីថ្ងៃទី៧ ដល់ថ្ងៃទី១៦ ខែធ្នូ នៅបរិវេណមុខប្រាសាទអង្គរវត្ត ដើម្បីរំលឹកគុណព្រះមហាក្សត្រនិងបុព្វការីជនដែលកសាងប្រាសាទនានាក្នុងរមណីយដ្ឋានអង្គរ និងដើម្បីអបអរសាទរខួប៣១ឆ្នាំនៃការដាក់បញ្ចូលតំបន់រមណីយដ្ឋានអង្គរក្នុងបញ្ជីបេតិកភណ្ឌពិភពលោករបស់អង្គការយូណេស្កូ។
ពិធីរំលឹកគុណអង្គរបានបើកជាផ្លូវការនៅថ្ងៃព្រហស្បតិ៍នេះ ក្រោមអធិបតីភាពលោកស្រី ពេជ ចន្ទមុន្នី ភរិយារបស់លោកនាយករដ្ឋមន្ត្រី ហ៊ុន ម៉ាណែត ព្រមទាំងលោកស្រី ម៉ែន សំអន សមាជិកឧត្តមក្រុមប្រឹក្សាព្រះមហាក្សត្រ និងលោកស្រី ភឿង សកុណា រដ្ឋមន្រ្តីក្រសួងវប្បធម៌និងវិចិត្រសិល្បៈ រួមជាមួយមន្ត្រីអាជ្ញាធរពាក់ព័ន្ធជាច្រើនទៀត។
លោក ឡុង កុសល អ្នកនាំពាក្យអាជ្ញាធរជាតិអប្សរា បានលើកឡើងថា នេះជាឆ្នាំទី៣ហើយ ដែលកម្ពុជារៀបចំព្រឹត្តិការណ៍រំលឹកគុណអង្គរ។ ព្រឹត្តការណ៍នេះមានប្រារព្ធពិធីបែបសាសនា ស្ដង់ពិព័រណ៌ និងការសម្ដែងសិល្បៈបុរាណនៅពេលរាត្រីសម្រាប់សាធារណៈទស្សនានិងសិក្សាស្វែងយល់ដោយសេរី។
លោកបញ្ជាក់ថា នៅថ្ងៃបន្តបន្ទាប់មានកម្មវិធីទស្សនីយភាពជាច្រើន ដូចជាការតាំងពិព័រណ៌បង្ហាញសមិទ្ធផលការងាររយៈពេល៣១ឆ្នាំរបស់អាជ្ញាធរជាតិអប្សរា ស្នាដៃសិល្បៈជាច្រើនដែលបានចុះក្នុងបញ្ជីបេតិកភណ្ឌអរូបីរបស់អង្គការយូណេស្កូ និងក្បួនព្យុះហយាត្រារបស់សិស្សានុសិស្សចំនួនជាង ១ ២៥០នាក់ក្រោមពាក្យស្លោកអរគុណអង្គរនិងអរគុណសន្តិភាព។ បន្ថែមលើសពីនេះ គឺមានការសម្តែងសិល្បៈល្ខោនយីកេនិងការសម្តែងសិល្បៈល្ខោនស្រមោលស្បែកធំជាដើម។
លោកបន្តថា៖ «រាល់កម្មវិធីសាសនានិងសិល្បៈទស្សនីយភាពទាំងអស់នឹងបើកជាសាធារណៈចូលទស្សនាដោយពុំមានបង់ប្រាក់នោះទេ»។
លោកអំពាវនាវដល់សាធារណជនជាតិអន្តរជាតិមកចូលរួមទស្សនាឱ្យបានច្រើនកុះករ។
លោក ស៊ុំ ម៉ាប់ អ្នកនាំពាក្យក្រសួងវប្បធម៌និងវិចិត្រសិល្បៈ បានបញ្ជាក់ថា ព្រឹត្តិការណ៍នេះ រៀបចំឡើងក្នុងគោលបំណងរំលឹកគុណអង្គព្រះមហាក្សត្រគ្រប់ព្រះអង្គនិងបុព្វការីជនដែលបានកសាងនិងថែរក្សាប្រាសាទទាំងអស់នៅក្នុងរមណីយដ្ឋានអង្គរ ដោយបានផ្តល់អត្ថប្រយោជន៍ជាច្រើនដល់ជាតិមាតុភូមិតាំងពីដើមរហូតដល់សព្វថ្ងៃ។
លោកបានប្រាប់ខ្មែរថាមស៍ថា គោលបំណងមួយទៀត គឺដើម្បីអបអរសាទរខួប៣១ឆ្នាំនៃការចុះបញ្ជីតំបន់រមណីយដ្ឋានអង្គរក្នុងបញ្ជីបេតិកភណ្ឌពិភពលោករបស់អង្គការយូណេស្កូ ក៏ដូចជាការលើកកម្ពស់អត្តសញ្ញាណជាតិ ក៏ដូចជាការដាក់តាំងបង្ហាញពីការងារនិងសមិទ្ធផលក្នុងរយៈពេល៣១ឆ្នាំនៃការងារទូទៅដែលអាជ្ញាធរជាតិអប្សរាសម្រេចបានក្នុងបំណងកិច្ចការអភិរក្សប្រាសាទដែលជាមរតកដ៏សំខាន់សម្រាប់ប្រជាជាតិកម្ពុជា។
លោកនិយាយថា រាល់ការរៀបចំគ្រប់ព្រឹត្តិការណ៍ទាំងអស់សុទ្ធតែទាក់ទាញចិត្តចាប់អារម្មណ៍មនុស្សដែលធ្វើឱ្យមានការចូលរួមច្រើន។ ដូច្នេះកម្មវិធីទាំងនេះសុទ្ធតែជាការចូលរួមចំណែកជំរុញទេសចរជាតិអន្តរជាតិ។
លោកបានលើកឡើងថា៖ «គំនិតជាចម្បងរបស់យើង គឺការរំលឹកគុណរបស់ដូនតាបុព្វបុរសយើងដែលបង្ហាញពីការខិតខំអភិរក្ស និងការអបអរសាទរខួបនៃការចុះបញ្ជីរមណីយដ្ឋានអង្គរជាបេតិកភណ្ឌពិភពលោកដើម្បីរំលឹកដល់ប្រជាជនទាំងអស់អំពីសារសំខាន់របស់បេតិកភណ្ឌ ហើយត្រូវចូលរួមទាំងអស់គ្នាដើម្បីកិច្ចការពារបេតិកភណ្ឌ»៕
